Úrskurður ríkisskattanefndar

Málavextir voru þeir, að kærandi og eiginkona hans voru búsett í Svíþjóð og áttu þar lögheimili. Eiginkonan átti íbúð hér á landi. Skattstjóri lagði á kæranda tekjuskatt, útsvar og sjúkratryggingagjald vegna þessarar eignar með vísan til 2. gr. laga nr. 68/1971. Með því að íbúðin hefði ekki verið leigð gegn eðlilegu endurgjaldi reiknaði skattstjóri tekjur af henni 1,1% af fasteignamatsverði, sbr. C-lið 1. mgr. 7. gr. skattalaga. Kærandi krafðist þess, að álögð gjöld yrðu felld niður.

Í úrskurði ríkisskattanefndar segir svo:

„Skattstjóri hefur ákvarðað tekjur með hliðsjón af reiknaðri eigin húsaleigu og fyrningu af fasteign sbr. C-lið 7. gr. laga um tekjuskatt og eignarskatt. Álagning skattstjóra er ákvörðuð í samræmi við þetta og eru ekki efni til að breyta þeirri álagningu.“

Staðfesti ríkisskattanefnd úrskurð skattstjóra.