Úrskurður ríkisskattanefndar

Úrskurður rskn. nr. 1127/1973

Gjaldár 1972

Lög nr. 68/1971, 11. gr., 15. gr. D-liður  

Opinber gjöld - Flýtifyrning

Málavextir eru þeir, að kærandi færði til frádráttar á framtali 1972 álagt aðstöðugjald 1971 kr. 634.000,00 og áætlaði aðstöðugjald skattárið 1971 kr. 514.000,00 og gerði þannig kröfu til frádráttar á aðstöðugjaldi tveggja ára á framtali 1972. Einnig færði kærandi til gjalda kr. 5.200.000,00 sem flýtifyrningu, en upphæð þessi var greiðsla inn á nýsmíði skips.

Skattstjóri synjaði kæranda um frádrátt þessara gjaldaliða og af hálfu ríkisskattstjóra var krafist staðfestingar á úrskurði skattstjóra.

Fallist var á þá kröfu kæranda með vísun til 11. gr. A-liðar og 19. gr. laga nr. 68/1971, að aðstöðugjald vegna skattársins 1971 væri frádráttarbært frá tekjum þess árs og var að því leyti fallist á kröfur kæranda, enda var verið að breyta um framtalsvenju að þessu leyti.

Hins vegar sagði í úrskurði ríkisskattanefndar, að samkvæmt 6. tl. 7. gr. laga nr. 7/1972 ætti krafa kæranda um frádrátt flýtifyrningar sér ekki lagastoð og slík heimild hefði ekki heldur verið í lögum árið 1970 þá er samningurinn um nýsmíðina var gerður og greiðsla samkvæmt honum innt af hendi. Var kröfu kæranda um þetta atriði því hafnað.

Þessi síða notar vefkökur

Nánari upplýsingar

Samþykkja